​

گرمانی مرکز زبان وادب ، لمز کی جانب سے علمی نثر سے متعلق اردو میں مقامی ضرورتوں کے مطابق تیار کردہ رہ نماکتاب علمی نثر: اصول و رسمیات ، اردو میں اپنی نوعیت کی پہلی رہ نماکتاب (مینوئل ) ہے۔ اس کتاب میں علمی نثر سے متعلق جملہ امور ، جیسے: موضوعِ تحقیق ، خاکہ سازی ، تحقیق اور تنقید میں طریقہ کار اور تھیوری کی اہمیت ، استفادے اور اقتباس کی بحث ، سرقہ ، علمی مقالات کی خلاصہ نگاری ، رموز اوقاف ، حوالہ دینے کا طریقہ ، کتابیات سازی ،حواشی و تعلیقات ،اشاریہ سازی اور ادارت کے اصولوں کا احاطہ کیا گیا ہے۔ نیز معیاری علمی نثر،ادبی نثر سے اس کے فرق اور علمی نثر کے خصائص اور اسلوب پر بھی ماہرین کی تحریریں شامل کی گئی ہیں۔ امید ہے کہ یہ کتاب اردو اور دیگر زبانوں کے بی ایس سے پی ایچ۔ ڈی کی سطح تک کے طلباو سکالرز اور علمی نثر لکھنے سے دل چسپی رکھنے والے عام مصنفین کے لیے مفید ثابت ہوگی۔گرمانی مرکز زبان و ادب اس کتاب کے تمام مصنفین، اور مرتبین: پروفیسر ڈاکٹر ناصر عباس نیّر اور ڈاکٹر شائستہ حسن کی اس اہم کاوش پر ان کا ممنون ہے۔

​